Oporretan goaz eta urtero lez 5 literatur gomendio

Gaur oporretan goaz Berbaizun eta urtero lez nonahi irakurtzeko bost liburu gomendatzen dizkizuegu, euskara elkartea izatearekin batera, kultur elkartea garelako. Hauek bost dira, baina beste bost izan zitezkeen:

- 33 ezkil (Elkar 2015): Misteriozko liburua idatzi du Miren Gorrotxategik. Garizmendi baserriko Ferminek burezur bat topatzen du lurperatuta eta Fermin semea eta bere andregai Berta hilotza ateratzea doazenean desagertua da eskeletoa. Ordutik aurrera, misterioa gero eta ilunagoa da… Urriaren 4an, gainera, idazlearekin berba egiteko aukera izango dugu Irakurleen Txokoan. Ez galdu!

Miren Gorrotxategi Irakurleen Txokoan

- Bainaren belaunaldia (Labayru, 2015): Ustela, Pott! eta Oh Euzkadi! literatur aldizkarien ibilbidea xehetzen du Beñat Sarasolak eta hiru aldizkari horiek euskarazko literaturaren bilakaeran izandako eragina aztertzen du donostiarrak. Izan ere, Bernardo Atxaga, Ramon Saizarbitoria, Koldo Izagirre, Joseba Sarrionandia edo Ruper Ordorika orri horietan hasi ziren idazten.

Zarauzko gutunak, 36.ko gerra (Amagoia Gurrutxaga Uranga, 2017): Izenburuak dioen bezala, 36.ko gerrak ekarri zituenak kontatzen ditu Amagoia Gurrutxagaren azkenak eta bere orriotan nabarian denez, lan hau urte askotako dokumentazio lan itzelaren ondorioa da, gerra zibilek izen-abizenez josita daudela gogoratzen diguna. Gainera, dokumentu hauek liburuan ikusi ahal dira.

Bost idazle Hasier Etxeberriarekin berbetan (Alberdania, 2003): Euskal Herriko letren errepublika txikiaren sortzailea omendu guran, bere liburu ospetsuenetako bat gomendatzen dizuegu. Orriotan Hasier Etxeberriak Joseba Sarrionandia, Bernardo Atxaga, Koldo Izagirre, Anjel Lertxundi eta Ramon Saizarbitoriarekin literaturaz eta besteaz berba egiten du, idazle hauen ibilbide literario zein pertsonalak ezagutzera emanez.

Anne Sexton (Susa, 2015): Munduko poesia euskara ekarri nahi duen 7. kaiera dugu hau. Harkaitz Canok itzulia, Anne Sexton poeta estatubatuarraren poema esanguratsuenak dakartza liburuak. Poema hunkigarriak eta sakonak, baita tristeak ere, dira hauek, zer pentsa ematen dutenak. Hona lagin bat:

Errauskine eta printzea,/bizi izan ziren pozez, betirako ustez, /museo bateko erakusleihoan legez,

[…]

Biki jator, irribarretsu, ipuinetakoena./ Istorio hori.

Partekatu

Urteurreneko herri-bazkarirako tiketak salgai!

Apirilaren 1a gero eta hurbilago dago eta urteurreneko herri bazkariko tiketak salgai jarri ditugu (arrunta 15€tan, ikasleak/ langabetuak 8€tan eta umeak doan). 14:30ean hasiko da eta Done Petrin egingo dugu. Eguraldi kaxkarra egingo balu, Ibarrekolandako patiora mugituko ginateke!

Zeure tiketa nahi baduzu, Berbaizu Euskara Elkartetik pasatu! 25 urte eta haZSten!

Larunbatean 12:00etan “Hiri-ibilbideak” Unamunotik!

Larunbat eguerdian Bertan Bilbo! liburuan oinarritutako Hiri-ibilbideak egingo dugu Unamunotik. Pedro Zuberogoitiak, liburuaren egileak, gidatuko du ibilbidea. Atzo Bizkaia Irratian bidearen nondik-norakoak zuten:

Bizkaia Irratia: Bertan Bilbo liburuan oinarritutako bisitak egingo dira Bilbon (12:05)

Eman izena 94 447 10 42an edo berbaizu@euskalnet.net helbide elektronikoan!

hiri_ibilbideak_eskuorria

PD: “Bertan Bilbo” esamoldeak zer esan nahi duen jakin nahi baduzu, sakatu hemen

Gaur 19:00etan Oihana Bartra Gazte Lokalean!

Gaur 19’00etan Oihana Bartra bertsolariak Nire amaren hiria (2015) dokumentala aurkeztuko digu Gazte Lokalean. Santutxuarrak Bilboko kulturgintzaren erradiografia egiten du EKT (Euskal Kulturaren Transmizioa) graduondoko bere amaiera lanean. Esan gabe doa dokumentalak Unibertsitatearen hormak gainditu dituela eta gaur Deustuan ikusteko aukera daukazu.

Ikusi nahi baduzu, erdu 19:00etan Gazte Lokalera!

Dokumental Zikloa

Bozkatu Bego Altuna Blogetan!

Berbaizuko bazkide den Begoña Altuna Azkue Fundazioak eta Argiak antolatutako blogetan! blog leihaketan parte hartzen ari da bere Han-hemenka blogarekin. Euskara hutsezko bidaia-blog hau gustatu bazaizue, lagundu Begoña zuen botoez hurrengo estekan: http://www.blogetan.eus/bozkatu/bloga/277 Zure eguneko botoak asko lagun dezake! Mila esker Begoñaren partez!

Han hemenka

 

Azken martxa hunkigarria

Akabuko martxea Gazte Lokalean

Oso bitxia da ume batek urteero bi eskoletan ikastea. Gaur ia ezinezkotzat joko genuke, baina transhumantzian ibiltzen ziren artzainen seme-alabeek halaxe egiten zuten: adibidez, Mikel Etxezarretak, Akabuko Martxeako protagonistak, Agurainen eta Plentzian ikasi zuen. Agurainen, Urbiatik hurbiltzen zegoen bordan bizi zelako eta Plentzian, abendutik maiatzera Barrikako baserri batean (Fano familiarena) egoten zelako. Berdin-berdin egiten du bizkaieraz zein gipuzkeraz.

Akabuko martxearen bidea bost egunetan egiten da oinez. Urbian hasi eta Algortan bukatu dute dokumentalean, Etxezarretarrak 1983era arte egin modura, eta bost eguneko martxan hainbat lagun topo egiten ditu bidean. Hunkigarria da, benetan, Mikelek Ciriaca Fano ikusten duenean, edota Algortako plazan gurasoei eskeintzen duenean Getxoko Udalak emandako oroigarriak. Izan ere, 1983ean eten zen milaka urteeko ohitura, zeinak Urbia inguruko artzainak eta familiak Bizkairantza mugiarazten zituen. Euskaraz, Euskal Herria agerian.

Sorpesa bat ekarri zigun Aitor Gisasolak Akabuko martxea eman aurretik: Dominica. Fredi Paiarekin batera egindako dokumental laburra, zortzi minutuko iraupenekoa, zeinak emakumeek artzaintzan egin duten lana ikusarazten baitu, Eli Arrilaga, Mikel Etxezarretaren emaztea, eta Dominicaren bizipenen bidez. Biak lanbidez artzain izanda ere, beste artzainek ez zituzten artzaintzat hartu alargundu arte. Izan ere, artzain izatea ez da batere samurra, oraindik eta gutxiago emakume izanik, eta bi dokumental zoragarriek lan honen ezaugarriak kontatzen dituzte.

Dominica eta Akabuko martxea salgai dituzue Berbaizun, 10€etan. Merezi du!

Hurrengo zita: martxoaren 1ean Nire Amaren Hiria dokumentalarekin! Oihana Bartra egilea dator!