Txantximozorroak prestatzen!

Oraindik ere urtarrila den arren, adi ibili ezean, mozorrorik gabe harrapatuko gaituzte inauteriek. Aurten goiz datozela gutxi bada ere, Deustun gainontzeko herrietan baino astebete lehenago ospatzen baititugu. Asteburu honetan izango ditugu aratusteak, beraz, eta Deustuko Jai Batzordeak otsailaren 2tik 4ra egitarau oparoa prestatu du.

Txantximozorroak prestatzen!

 Txantxikukook igande goizeko desfilean hartuko dugu parte urtero lez, eta zorionez, erne ibili eta aurreko bi asteburuetan lan eta lan ibili gara mozorroa egiten, inauteriek ustekabean eta zer jantzi jakin gabe harrapatu ez gaitzaten. Lehenengo asteburuan soinean eramango dugun jantzia prestatzen eta bigarrenean konplementuak eta karroza egiten ibili gara. Xehetasun handirik ezin dugu eman, Deustun ohitura denez, konpartsa, kuadrila, zein aisialdi taldeen mozorroak sekretuan gordetzen baititugu (edo saiatzen gara, behintzat) desfile egunerarte. Beraz, ondorengo argazkiekin pistaren bat emango dugu agian, baina datorren iganderarte ez duzue jakingo aukeratu dugun gaiarekin asmatu duzuen.

Txantximozorroak prestatzen!Jakiminez beterik zaudetela badakigunez, desfilean ikusiko dugu elkar, Deustuko kaleetan zehar, gu hortik ibiliko baikara dantzan, abesten eta oihukatzen, eta ahal bada, jasotako saria ospatzen ere, noski! 

Txantximozorroak prestatzen!

 Iku, iku… Deustutik datorren artista da Txantxiku!
Partekatu

Inauteriak Berbaizun

Deustuko Inauteriak gero eta hurbilago dago eta Berbaizuk bere alea jarriko du. Aurten ere Jai Batzordeak antolatutako jardueretan parte- hartuko dugu eta, horretaz gain, bere ekintza propioak antolatuko ditu:

Otsailaren 2an 20:00etan: Laboaren aztarnak Müllerenean:

Zenbat taldek hainbat aretotan Mikel Laboaren kantak joko dituzte eta otsailaren 2an 20:00etan Nebbian taldeko kideek musikari pasaitarraren ondarea ekarriko digute Müllereneara. Gernikarrek Laboaren musikaz gozatzeko aukera paregabea eskainko digute!

Otsailaren 3an 20:00etan: Txotx irekiera Müllerenean!

Inauterietan ohitura bihurtu den Deustuko Txotx Irekiera egingo dugu Müllerenean. Beti lez, sagardo kupela ekarriko dugu eta sorpresa izango den txotxeroak ‘hauxe da Deustuko sagardo berria’ esango du edaten hasi aurretik. Zer jan eta zer edan egongo da giro onean! Aurten, Euskaraldiaren harira, ahobizi edo belarriprest txapa ekartzeko gonbitea egiten dizuegu!

TXOTX KARTELA AZKENA

Otsailaren 4an 19:00etan, Agate Deuna Done Petritik

Otsailaren 4an Agate Deunaren koplak kantatuko ditu Kantugintza taldeak. 19:00etan aterako dira Done Petritik, inauteriei kantuz agur esateko.